கோணல் பார்வை பார்க்கும் நேசகுமார் - 2

எனது இந்த பதிவை ஆரம்பிப்பதற்கு முன்னால் முஸ்லிம் நன்பர்களுக்கு அனைவருக்கும் ஒரு வேண்டுகோள் விடுக்கிறேன்.
நன்பர் மயிலாடுதுறை சிவா May 16, 2005 அன்று எழுதிய "இஸ்லாமியர் அல்லாதவர்கள் மெக்காவிற்கு போக முடியுமா?" என்கிற பதிவு மற்றும் பிற பல பதிவுகளின் பின்னூட்டங்களில் தேவையில்லாமல் ஒவ்வொருவரும் மாறி மாறி ஒருவரையொருவர் விமர்சித்து எழுதியிருந்ததை படித்தேன். ஒரு விசயத்தைப் பற்றி ஆழ்ந்த, தீர்க்கமான அறிவு இல்லாமல் எதையோ நாம் எழுதப் போய் அதில் நாம் சில தவறுகளை செய்து விட்டால் அதற்கு இஸ்லாமிய சாயம் பூசி, மெருகேற்றி இஸ்லாம்தான் அதற்கு காரணம் என்று மக்களை முட்டாளாக்கும் முயற்சி நடைபெற்றுக் கொண்டு வருகிறது. இது அனைவரும் அறிந்த உண்மையே. எழுதிய அனைவரையும் நான் குறை கூறவில்லை. ஒரு சிலர் செய்கின்ற தவறுகளுக்கு ஒட்டு மொத்த இஸ்லாமிய சமுதாயம் செய்ததாக மக்களிடையே பரப்பப்படுவதால் நீங்கள் எதை எழுதுகின்றீர்களோ அதனை தீர ஆலோசித்து அல்லது மார்க்க அறிஞர்களிடம் ஆலோசனைப் பெற்றபின் வேகத்தை விடுத்து விவேகத்தையும், நிதானத்தையும் கடைபிடித்து எழுதுமாறு கேட்டுக்கொள்கிறேன்.
முஸ்லாமல்லாத மாற்று மத நன்பர்ளே நடுநிலையுடன் சிந்திக்க வேண்டுகிறேன் !
எந்த மதகோட்பாட்டைச் சேர்ந்தவராக இருந்தாலும் அல்லது மத கோட்பாட்டிற்கு அப்பாற்பட்டவராக இருந்தாலும் ஒட்டு மொத்த மனித இனம் முழுவதும் ஏற்றுக் கொண்ட ஒரே ஒரு உண்மை என்னவென்றால் என்றாவது ஒரு நாள் மனிதன் தன்னுடைய மரணத்தை அடைந்தே தீருவான் என்பதுதான்.
மரணத்திற்கு பிறகு வேறொரு வாழ்க்கை இருக்கிறதா அல்லது இல்லையா என்பதில்தான் அனைவரும் கருத்து வேறுபாடு கொண்டுள்ளோம்.
அதில் ஒன்று ...
மரணத்திற்கு பிறகு வேறொரு வாழ்க்கை என்பதெல்லாம் கிடையாது. இதெல்லாம் பூச்சாண்டி வித்தைகள் தான். மக்களை பயமுறுத்தி தங்களது சுய லாபத்தை அடைவதற்காக செய்த வீண் வேளைகள் தான் .... என்பது போன்று ஒரு சாராரின் வாதம்.
மற்றொன்று ...
மரணத்திற்கு பிறகு வேறொரு வாழ்க்கை இருக்கிறது. இவ்வுலகம் தான் மரணத்திற்கு பின்னுள்ள வாழ்க்கைக்காண பரிச்சைக் களம். அதில் நன்மை மற்றும் தீமைகளைப் பற்றி இறைவனின் கோட்பாடுகள் மற்றும் இறைதூதரின் போதனைகளைக் கொண்டு எச்சரிக்கை செய்யப்பட்டுள்ளோம். யார் இறைக்கட்டளைக்கு கட்டுப்பட்டு நன்மையை செய்து தீமையை விட்டு தன்னை தடுத்தும் வருகின்றாரோ அவருக்கு சுவர்க்கம் என்றும், மாறு செய்பவர்களுக்கு நரகம் ... என்பது போன்று மறுசாராரின் வாதம் அமைந்துள்ளது.
ஒரு வாதத்திற்காக மரணத்திற்கு பிறகு வேறொரு வாழ்கை இல்லை என்று சொல்வது சரியென்று வைத்துக்கொள்வோமேயானால் அதனால் நஷ்டப்படுவது இரு சாராரும் இல்லை.
அதே சமயத்தில் ...
மறுசாராரின் வாதம் (அதாவது மரணத்திற்கு பிறகு வேறொரு வாழ்க்கை இருக்கிறது. இவ்வுலகம் தான் மரணத்திற்கு பின்னுள்ள வாழ்க்கைக்காண பரிச்சைக் களம்... போன்றவற்றை) சரியென்று வைத்துக்கொண்டால் அதில் நஷ்டப்படுவது நான் மேலே கூறிய முதல் சாரார் தான் என்பதை கருத்தில் வைத்துக் கொண்டு நடுநிலைமையுடன் சிந்தித்து செயல்படுமாறு பணிவுடன் கேட்டுக்கொள்கிறேன்.
மேலும் முஸ்லிம்கள், இஸ்லாம்தான் முழுமனித குலத்திற்கும் நேர்வழிகாட்டி அதுவல்லாத அனைத்தும் வழிகேட்டின் பக்கம் அழைத்துச் செல்கின்றது என்கின்றனர். இஸ்லாத்திற்கு எதிராக எழுதுபவர்கள் மற்றும் அதன் அடிப்படைவாதத்தை குறை கூறுபவர்கள் அனைவரும் இஸ்லாமும் வழிகேட்டின் பக்கமே மக்கள் அனைவரையும் வழிநடத்துகிறது என்கின்றனர். வழிகேடு என்றொன்றிருந்தால் நேர்வழியும் இருக்கத்தானே வேண்டும். எனவே இஸ்லாம் மக்களை வழிகெடுக்கிறதென்றால் மக்களை திசை திருப்ப முயலாமல் உங்களுடைய நேர்வழியையும் ஆதாரத்தின் மூலமாக எடுத்து வையுங்களேன் பார்ப்போம்.
அடுத்தது நேசகுமார் 18.5.05 அன்று எழுதிய பதிவில் கீழ்கண்டவாறு கேள்வி கேட்டிருந்தார்//...ஸஹீயான ஹதீதுகள் இவைதான் என்று முஸ்லிம் சமுதாயம் முழுவதும் ஒப்புக் கொள்ளும் ஒரு பட்டியல் இருக்கிறதா?
எனக்குத் தெரிந்தவரை இப்படியொரு ஒத்த கருத்து இஸ்லாமியர்களிடையே இல்லை. ஒரு சாரார் சொல்வதை மறுசாரார் மறுப்பதும், ஒருவர் அளிக்கும் விளக்கத்தை மற்றவர்கள் மறுப்பதும் ...//
உண்மைதான் நேசகுமார் அவர்களே! முஸ்லிம் சமுதாயம் முழுவதும் ஒப்புக்கொள்ளும் ஒரு பட்டியல் இல்லைதான். மேலும் அப்படி இருக்கவும் வாய்ப்பில்லைதான் ஏனென்று சொன்னால் நம்முடைய (அகில உலகத்திற்கும்) இறை தூதராகிய நபிகள் நாயகம் (ஸல்) அவர்கள் நமக்கு அப்படித்தான் முன்னறிப்பு செய்தார்கள் அது என்னவென்றால் "... என்னுடைய சமுதாயத்தினர் 73 பிரிவினராக விரைவில் பிரிந்து போவார்கள், அதில் ஒரு பிரிவினரைத்தவிர மற்ற அனைவரும் நரகிற்கே செல்வார்கள் ..." (நூல்: அபூ தாவூத், திர்மிதி) என்கிற ஹதீதை உண்மைபடுத்துவதாகத்தான் நீங்கள் எழுதிய கூற்று இருக்கிறது. மேலும் ஒவ்வொரு பிரிவினரும் தன்னை வழிகேட்டில் இருப்பதாக நிச்சயமாக ஏற்றுக்கொள்ள மாட்டார்கள் மாறாக நாங்கள் தான் நேர்வழியில் இருக்கின்றோம் என்று தான் கூறுவார்கள். அதில் பெரும்பாலோர் குர்ஆன் மற்றும் ஹதீதுகளையே ஆதாரமாக எடுத்து வைப்பர். யார் நேர்வழியைத் தேடி அதனைப் பெற முயற்சி செய்கிறாரோ நிச்சயமாக அல்லாஹ் அவர்களுக்கு அந்த நேர்வழியை இலகுவாக்கி வைப்பான். ஆனால் யார் வழிகேட்டை தேடி அதற்காக முயற்சி செய்கிறார்களோ அவர்களும் குர்ஆனையும் ஹதீதுகளையும் ஆதாரமாகக் காட்டியே மக்களை வழிகெடுப்பார்கள். கீழ்கண்ட குர்ஆன் வசனத்தில் அதுபற்றி இறைவன் கூறுகின்றான்.
(இறைவனாகிய) அவன்தான் (இவ்) வேதத்தை உம்மீது இறக்கிவைத்தான். இதில் விளக்கமான வசனங்களும் இருக்கின்றன. மற்றவை (பல அர்த்தங்களைக் கொண்ட) முதஷாபிஹாத் (என்னும் வசனங்கள்) ஆகும். எனினும் எவர்களுடைய உள்ளங்களில் வழிகேடு (என்னும் நோய்) இருக்கின்றதோ அவர்கள் குழப்பத்தை ஏற்படுத்துவதற்காக (பல அர்த்தங்களைக் கொண்ட) முதஷாபிஹ் வசனங்களின் விளக்கத்தைத் தேடி அதனைப் பின்பற்றுகின்றனர். அல்லாஹ்வைத்தவிர வேறு எவரும் அதன் உண்மையான விளக்கத்தை அறிய மாட்டார்கள். கல்வியில் உறுதிப்பாடு உடையவர்கள் அவை அனைத்தும் எங்கள் இறைவனிடமிருந்து வந்தவைகள்தான், நாங்கள் அதை நம்பிக்கை கொள்கிறோம் என்று கூறுவார்கள். அறிவுடையோரைத் தவிர மற்றவர்கள் இதைக்கொண்டு நல்லுபதேசம் பெறமாட்டார்கள். (திருக்குர்ஆன் 3:7)மேலும் உங்களது எழுத்தாற்றல் சிறந்ததா அல்லது என்னுடைய எழுத்தாற்றல் சிறந்ததா மேலும் வெற்றி பெற்றவன் நீங்களா அல்லது நானா என்பதும் அல்ல எனது வாதம்.
உதாரணத்திற்கு ஒருவர் இஸ்லாத்தைப்பற்றி சொல்வது தவறாக இருந்து அதில் அவர் தோற்றுவிட்டார் என்று வைத்துக்கொண்டால் அவரிடம் எழுத்தறிவில் குறைவு அல்லது இஸ்லாம் பற்றிய முழுமையான ஞானம் இல்லை என்றுதான் அதற்கு அர்த்தமே தவிர இஸ்லாத்தில் குறை என்று அதற்கு அர்த்தமாகாது. ஏனென்று சொன்னால் இணைய தளத்தில் பங்கேற்கும் அனைவரும் இஸ்லாமிய அறிவு முழுமையாக அறிந்தவர்களில்லை. அதில் ஒரு சிலர் தானாகவே வலைப்பதிவின் மூலமாகவும், பின்னூட்டங்களின் மூலமாகவும் ஒப்புக்கொண்டதையும் நீங்கள் படித்திருக்கக் கூடும்.
மேற்கூறப்பட்ட விசயங்கள் ஆரோக்கியத்திற்கும் பொருந்தும்.
இஸ்லாத்தை குறை கூறி எழுதுகின்றவர்களில் பெரும்பாலோர்களின் பதிவுகளில், அதிகமாக அறிஞர்களின் கருத்தையே மேற்கோள் காட்டுகின்றார்கள். எனது அறிவுக்கு எட்டிய வரையில் எந்த ஒரு முஸ்லிமும் எந்த அறிஞர்களையும் முஸ்லிம் சமூகத்தின் வழிகாட்டி என்று கூறியதில்லை. அப்படி யாரேனும் எழுதி இருந்தாலும் அதுவும் தவறு தான். முஸ்லிம்களுக்கு வழிகாட்டியெல்லாம் குர்ஆனும் நபி மொழிகளும் தான்.
நேசகுமாருடைய மேலேயுள்ள கேள்விக்கு தற்காலிக பதில் என்னவென்றால் இறைவன் இருக்கின்றான் என்பதை முதலில் ஏற்றுக் கொள்ளுங்கள் பிறகு ஹதீதுகள் என்றால் என்ன? அவை எவ்வாறு கோர்வை செய்யப்பட்டது? எந்த நிபந்தனைக்கு உட்பட்டிருந்தால் அதை ஏற்றுக் கொள்ளலாம் அல்லது எந்த நிபந்தனைக்கு மாற்றமாக இருந்தால் அதனை புறக்கணிக்கலாம் என்பதைப் பார்ப்போம்.
குர்ஆன் இறைவனால் அருளப்பட்டது என்பதற்கான ஆதாரத்தை நான் (இறைவன் நாடினால்) பின்பொரு பதிவில் எடுத்து வைக்க இருக்கிறேன்.

அன்புள்ள ஆரோக்கியம் அவர்களுக்கு

ஒரு விசயத்தை விளங்கிக் கொள்வதில் அவரவர் அறிவுக்கு எது சரி என்று படுகிறதோ அதைத்தான் அவர்கள் ஏற்றுக்கொள்வார்கள். நம்முடைய கருத்தை நீங்கள் ஏற்றுக் கொள்ளதான் வேண்டும் என்று நாம் யாருக்கும் நமது கருத்தை திணிக்க முடியாது.
அரபி மொழிதான் குர்ஆன் மற்றும் ஹதீதுகளின் மூலம், ஒரே வார்த்தைக்கு பல அர்த்தங்கள் உள்ளன. இந்த அறிஞர் இந்த கருத்தை சொல்லுகிறார். அந்த அறிஞர் அந்த கருத்தை சொல்லுகிறார் இதற்கு நீங்கள் என்ன சொல்லுகிறீர்கள் என்று நீங்கள் கேள்விகளை அடுக்கிக் கொண்டே போகலாம். அதனால் ஒரு சம்பவத்தை பற்றி குறிப்பிடுவதாக இருந்தால் அது போன்ற ஒரு நிகழ்வு நபிகளாரின் ஆட்சிக் காலத்தில் நடந்தது என்று ஆதாரத்தின் மூலம் நிருபித்துக்காட்டுங்கள். பிறகு அதனைப்பற்றி விவாதிப்போம். குர்ஆன் மற்றும் ஸஹீஹான ஹதீதுதான் உங்கள் ஆதாரமாக இருக்க வேண்டுமே தவிர அறிஞர்களின் கருத்துக்களை எடுத்து வைக்க கூடாது.
ஏனெனில் முஸ்லிம்களாகிய நாங்கள் நம்புவது அல்லாஹ் ஒருவனே அகில உலகத்திற்கும் இறைவன். அல்லாஹ் உடைய தூதர் நபி (ஸல்) அவர்கள் என்பதுதான். அல்லாஹ் திருக்குர்ஆனை இறக்கிவைத்தான் அதில் எந்த வித குறைபாடும் இல்லை, மேலும் நபி (ஸல்) அவர்களின் காலத்திலேயே முழு இஸ்லாத்தையும் பரிபூரணப்படுத்திவிட்டான். நபிகளாரின் வாழ்வினிலும் எந்தவித குறைபாடும் இல்லை. நபி அல்லாத மற்றனைவரும் குறைகளுக்கு அப்பாற்பட்டவர்கள் என்று யாருக்கும் உத்திர வாதம் கொடுக்க இயலாது.
எனவே அறிஞர்களின் கூற்றை உங்களுடைய ஆதாரமாக வைக்காமல் குர்ஆன் மற்றும் ஸஹீஹான ஹதீதுகளின் மூலம் உங்கள் ஆதாரத்தை எடுத்து வைக்குமாறு கேட்டுக் கொள்கிறேன்.

கோணல் பார்வை பார்க்கும் நேசகுமார்.

12.05.2005
சகோதரர்களே விழித்திடுங்கள் !!!
இஸ்லாத்தைப்பற்றி மிகவும் அறிந்தவர் போன்று எழுதும் நேசகுமார் அதனுடைய அடிப்படை அறிவு கூட தெரியவில்லை என்பது தான் யதார்த்தம்.
ABCD கூட தெரியாத ஒருவர் ஆங்கிலத்தில் எழுதினால் அல்லது பேசினால் எவ்வாறு இருக்குமொ அவ்வாறுதான் நேசகுமாருடைய எழுத்துக்களும்.
எனக்கு கம்பியூட்டர் பற்றிய அறிவு இல்லை, மேலும் அதைப் படித்தறிந்து கொள்ளும் ஆர்வமும் எனக்கில்லை ஆனால் நான் கம்பியூட்டர் பற்றி நான் உங்களுக்கு பாடம் எடுக்கப் போகிறேன் என்னிடம் வந்து படித்துக் கொள்ளுங்கள் என்று கூறினால் என்னை ஒரு கிறுக்கன் அல்லது பைத்தியக்காரன் என்று தானே நினைப்பீர்கள் அதே போன்றுதான், நேசகுமார் ஹதீதுகள் என்றால் என்ன? அது எவ்வாறு உருவானது? எப்படிப்பட்ட ஹதீதுகளை ஏற்றுக்கொள்ளலாம் அல்லது எப்படிப்பட்ட ஹதீதுகளை நிராகரித்து விடலாம் என்ற அடிப்படை அறிவு அறவே இல்லை. உதாரணத்திற்கு 1+1 = 2 Decimal கணக்கின் படி அதே சமயம் 1+1 = 10 Binary கணக்கின் படி, Binary கணக்கு தெரியாதவர்களிடம் சென்று 1+1 = 2 தான் வரவேண்டும் என்று கூறுவது மடத்தனமாக இல்லையா? இதே போன்று தான் நேசகுமார் தனக்கு தெரிந்து கொண்டே மறைக்கிறார் அல்லது உண்மையை தெரியாமல் உளறி, மக்களையும் குழப்பத்தில் ஆழ்த்துகிறார். மேலும் ஹதீது சம்பந்தமாக அப்துல்லாஹ்வும், ஸலாஹீத்தீனும் விளக்கம் கொடுத்த பின்னரும், அதை எல்லாம் கண்டு கொள்ளாமல் தான் தோன்றித்தனமாக தொடர்ந்து எழுதித் தள்ளுகிறார் (நிறை குடம் தழும்பாது என்று சொல்வார்கள்.) இது போன்ற அரை குறைகளுக்கு வேண்டுகோள் விடுக்கிறேன். தயவு செய்து முதலில் குர்ஆன் மற்றும் ஹதீதுகளின் அடிப்படைகளை முதலில் படித்துவிட்டு அதன் பின்னர் அதனடிப்படையில் இந்த விவாத களத்திற்கு வந்தால் அது எல்லோருடைய அறிவுக்கும் பொருந்தக்கூடிய ஒன்றாக அமையும்.
நபி (ஸல்) அவர்கள் நல்ல மனிதராக வாழ்ந்துவிட்டு மக்களுக்கு நற்போதனைகளை எல்லாம் வழங்கிவிட்டு சென்றுள்ளார்கள். அதனை பின்பற்றுவது ஒவ்வொரு முஸ்லிமுடைய கடைமை. எல்லா மதத்திலும் நல்லவர்களும் இருக்கிறார்கள், கெட்டவர்களும் இருக்கிறார்கள். அதே போன்றுதான் இஸ்லாத்திலும் நல்லவர்களும் இருக்கிறார்கள் கெட்டவர்களும் இருக்கிறார்கள். ஒரு ஆசிரியர், மாணவர்களிடம் திருடாதே, பொய் சொல்லாதே... என்று நல்லுபதேசங்களை செய்த பின்னரும் அந்த மாணவர்கள் திருடினால் அல்லது பொய் சொன்னால் அதற்கு அந்த ஆசிரியர் செய்ததுதான் குற்றம் என்று நேசகுமார் கூறினாலும் அதில் ஆச்சர்யபடுவதிற்கு ஒன்றுமில்லை.
உதாரணத்திற்கு நேசகுமாருடைய 01.03.05 அன்று எழுதிய பதிவிலிருந்து.
"பாகிஸ்தானில் அல்லாஹ்வைத் திட்டினால் ஆயுள் தண்டனை, நபிகள் நாயகத்தைத் திட்டினால் மரண தண்டனை என்பதெல்லாம் இந்த அரசியல் இஸ்லாத்தின் நீட்சிதான்... "
பாகிஸ்தானில் ஒரு சட்டம் நடைமுறையில் உள்ளதென்றால் அதற்கும் இஸ்லாமிய சட்டத்திற்கும் என்ன சம்பந்தம் இருக்கிறது. குர்ஆனிலோ அல்லது ஸஹீஹான ஹதீதுகளிலோ எங்கேனும் இவ்வாறு இருந்தால் அதைப்பற்றி குறிப்பிட்டால்தான் அது உங்களுடைய வாதத்திற்கு வலுசேர்ப்பதாக இருக்கும். "மொட்டை தாத்தா குட்டையில் விழுந்தது போல்" இது போன்ற உதாரணங்களை எழுதுவதை விட்டு விட்டு ஒழுங்கான ஆதாரங்களை குர்ஆன் மற்றும் ஸஹீஹான ஹதீதுகளின் அடிப்படையில் எழுதும் படி கேட்டுக்கொள்கிறேன்.
இன்ஷா அல்லாஹ் தொடர்கிறேன்.